بعد انضمامه رسميا.. حامد حمدان يشارك في تدريبات بيراميدز للمرة الأولى
شارك الدولي الفلسطيني حامد حمدان في تدريبات نادي بيراميدز لأول مرة بعد انضمامه لصفوف النادي قادما من صفوف نادي بتروجت في أولى صفقات بيراميدز الشتوية.
وشارك حامد حمدان في مران بيراميدز الذي أقيم صباح اليوم بملعب الدفاع الجوي، على أن يشارك في المران المسائي بعد قرار الجهاز الفني بقيادة الكرواتي كرونسلاف يورتشيتش بالتدريب مرتين لرفع معدل اللياقة البدنية بعد العودة من فترة الأجازة.
ومن المقرر أن يتواجد اللاعب مع بعثة بيراميدز التي تغادر صباح الاثنين إلى الإمارات لخوض معسكر إعداد خارجي في أبوظبي يستمر حتى يوم 15 يناير الجاري.
أعلن نادي بيراميدز تعاقده رسميا مع الدولي الفلسطيني حامد حمدان قادما من صفوف نادي بتروجت ليدعم صفوف الفريق في خط الوسط.
ويبلغ حامد حمدان من العمر 25 عاما وبدأ مشواره في نادي غزة، قبل أن ينتقل إلى نادي بيراميدز ومنه إلى الإنتاج الحربي ثم الجزيرة والمجد وأخيرا بتروجت قبل الانضمام لنادي بيراميدز.
وسبق لحامد حمدان أن لعب 9 مباريات دولية بقميص المنتخب الفلسطيني وسجل هدفا واحدا.
كشف الإعلامي محمد المحمودي كواليس مشوار الفلسطيني حامد حمدان وبداية متابعة نادي بيراميدز لنجم فريق بتروجيت حتي لحظة الإعلان عن ضمه إلي صفوف الفريق السماوي.
قال المحمودي عبر برنامج هاتريك: من ساعات قليلة أعلن نادي بيراميدز إن حامد حمدان أصبح سماوي بألوان نادي بيراميدز بعد مفاوضات تمت في خلال 24 ساعة، أسرع صفقة ربما في التاريخ الحديث في كرة القدم المصرية.
تابع: بداية القصة من هنا وإحنا ماشيين نعدي على الأهلي ونعدي على الزمالك .. المشهد الأول: مباراة "مسار" مع بيراميدز في الكأس، إيه اللي حصل؟ بيراميدز فاز بصعوبة جداً في هذه المباراة بدون الدوليين، أهمهم الكارتي وبلاتي .. الملاحظ إنه في "إنتركونتيننتال" بعد كده الكأس مستوى بيراميدز قل، فـ "يورتشيتش" اتكلم مع إدارة نادي بيراميدز بإنه لو إحنا بنبني لـ 2029 في المونديال، نص الملعب ده لازم يتجدد في الوقت الحالي.
أضاف: المعلومة المهمة في القصة إنه المسؤولين عن بيراميدز في الوقت الحالي لما خاطبوا الإدارة الإماراتية وصل لهم الكلام فيما معناه: "إحنا مش فرحانين علشان إنتوا تخطيتوا الدور الأول مثلاً من دور المجموعات في دوري أبطال أفريقيا ده الطبيعي، ومش فرحانين إن إنت لحد النهارده في منافسة على الدوري المرحلة دي خلصت، شوف إنت محتاج إيه علشان ده لازم يكون الطبيعي بتاع بيراميدز"... وبالتالي بدأت أولى الخطوات نحو حامد حمدان متأخر جداً.
واصل: المشهد بقى من عند النادي الأهلي: حامد حمدان زي ما قلنا الأسبوع اللي فات أحد المسؤولين الكبار داخل النادي الأهلي تواصل معاه وقعد معاه مضّاه، الراجل ده مضى للأهلي.. مضى على إيه؟ مضى على عقود بعد يوم الاتنين تفيد بأن رغبته بعد ما كانت اللعب للزمالك -عشان المشهد القانوني يكون مظبوط- فـ "أنا موافق على الانتقال للنادي الأهلي في حال موافقة بتروجيت على هذا العرض". يعني الراجل كان هيلعب للأهلي.
عوامل فشل الأهلي ونجاح بيراميدز
وأكمل: وبعدين حصلت حاجتين: أول حاجة إنه سمع إنه " ييس تورب" مدي الأولوية لتجديد عقد ديانج.. لإنه كان في محاولات لتشويه المشهد الخاص بيه بإنه الراجل بتاع فلوس، هو اختار بيراميدز عشان الفلوس، وده غير حقيقي لسبب واحد، إن العرض بتاع ليبيا أعلى من الأهلي وطبعاً الزمالك وبيراميدز، فالعرض الليبي اللي جاله كان يخلص كل هذا الكلام.. لكن هو حس إنه رقم واحد في تفضيل لموضوع ديانج عليا وأنا مش محطوط في الحتة اللي أنا فيها.
وأتم: التانية وهي الأهم هي اللي خلصت على كل حاجة: سوء التواصل. سوء التواصل اللي هو إيه؟ اللي هو إن الراجل ده بعد ما خلاص أبديت الرغبة وقلت أمين وأهلاوي والموضوع خلاص بينتهي، ماحدش قال لي حاجة .. سؤال بقى مهم: لماذا لا يوجد مدير تعاقدات داخل النادي الأهلي؟ علامة استفهام. لماذا لا يوجد مدير تعاقدات من المنوط به حسم هذه الأمور؟ لا يفترض إن يكون الكابتن محمود الخطيب، وإذا كان كابتن سيد، إذا كان كابتن يوسف، إذا كان كابتن وليد، مهما كان مين اللي بيخلص، تأخر. وتأخر ليه؟ لأنه يبدو إن الصلاحيات اللي عنده مش كاملة.
وقال أيضا: الموضوع بديهي جداً، وجمهور الأهلي اللي شاف مثل هذا النوع من الصفقات بيروح، هو راح لأسباب مشابهة، أو لأنه السقف المحطوط للمقابل المادي مش كبير فأنت أدواتك في التفاوض ضعيفة، يعني أنا حاطط سقف مش هعديه طب المهاجم ممكن يعدي الكلام ده راح، أو إنه أنت مستني كل مرة لحد ما شخص ما يقول أمين فتأخرت فاللي جنبك هيسبقنا.
وأستطرد: كنا قلنا لحضراتكم من أسبوعين إنه ترتيب العروض: الزمالك رغبة أولى عند حامد حمدان. العروض المصرية: بيراميدز هو الأعلى محلياً. وبيراميدز نرجع له بقى بعد المشهد الأول، رجع في الـ 24 ساعة قبل إنهاء الأمور واتكلم مع حامد حمدان: "مقدم التعاقد بتاعك يا معلم، التوقيع في 24 ساعة، هتنزل التدريب بكرة، إحنا بانيين عليك مشروع بيراميدز لكأس العالم 2029.
واختتم حديثه قائلا: حامد حمدان إختار إنه أنا رايح تجاه بيراميدزلإنه في النهاية الناس كان رؤيتهم أوضح مشروعهم أوضح خلصوا الأموروالعرض المادي أفضل من الأهلي ونقطة في الحسبان مهمة لكن مش هي كل حاجة لإن زي ما قلت العرض الليبي كان أكبر وكان أعلى .. ده المشهد اللي موجود عند حامد حمدان في هذه الصفقة بكل الكواليس اللي حواليها.