أحلام على ضفاف الترعة.. أمنيات أهالي القليوبية المؤجلة من 2025

«مش بحلم بحاجة كبيرة.. أنا بس عايز أعيش كويس»، بهذه الكلمات بدأ محمد محمود، أحد أبناء محافظة القليوبية، حديثه لـ«إيجبتك» عن أحلام دخل بها عام 2025، لكنها ظلت معلّقة ولم تجد طريقها إلى التنفيذ، لتتحول إلى أمنيات مؤجلة ينتظر تحقيقها في العام الجديد.

خطر يومي يهدد حياة الطلاب

يشير محمد إلى واحدة من أخطر المشكلات التي تواجه الأهالي في منطقته، قائلًا لموقع «إيجبتك»:
«من أكبر الأحلام اللي متحققتش في 2025، إننا نشوف حل لمشكلة عبور ولادنا ترعة الشرقاوي قدام مدارسهم في ميت نما ومنطاي».

يضيف محمد، «مئات الطلبة بيعدّوا الترعة كل يوم بمعدية بدائية مربوطة في حبل، منظر يخوّف أي أب أو أم، خصوصًا وقت الزحمة، واللي بتخلّي ولادنا معرضين يقعوا أو يغرقوا في أي لحظة».

وتابع المواطن، «إحنا مش بنطلب المستحيل، كل اللي طالبينه كوبري مشاة يحمي ولادنا وهم رايحين وراجعين من مجمع مدارس المنارة، ومدرسة ميت نما، والمعهد الديني».

ويؤكد أن المطلب بسيط لكنه حيوي: «الكوبري ده هيخدم مئات الأسر، وهيشيل الخطر اليومي من على أولادنا، ده أقل حق للطفل إنه يروح مدرسته ويرجع بيته بأمان».

حلم شخصي: فرصة عمل بدخل أفضل

ولا يخفي محمد أن لديه حلمًا شخصيًا لم يتحقق بعد، قائلًا:«على المستوى الشخصي، نفسي ألاقي فرصة عمل بدخل أفضل، شغل يخليني أعرف أواجه مصاريف الحياة وأطمن على مستقبل أولادي».

أزمة السكن وحلم الاستقرار

ومن جانبه، يتحدث المواطن علي لموقع «إيجبتك» عن ملف آخر لا يقل معاناة بالنسبة لأسر كثيرة في القليوبية، قائلًا: «فيه مشكلة كبيرة بتواجه أسر كتير في حي شرق شبرا الخيمة، وهي أزمة شقق مساكن الزهور والري وأسكو».

ويضيف موضحًا: «ناس كتير ساكنة الشقق دي من سنين، وعايشة في قلق دائم بسبب ارتفاع قيمة الإيجارات وعدم وضوح الموقف القانوني».

ويطالب بحل منصف للأزمة: «كل اللي بنطلبه حل عادل، يا إما تمليك الشقق للمتضررين، أو على الأقل تخفيض قيمة الإيجار اللي بقى عبء تقيل على أسر كتير».

وتابع علي، «تحويل ملف المتضررين للمستشار القانوني للمحافظة علشان يدرس أفضل السبل للحل، خلّى عندنا أمل إن الأزمة دي تشوف نهاية قريبة».

حلم شخصي: سيارة تُنهي معاناة المواصلات

وعن حلمه الشخصي، يقول علي: «نفسي يكون عندي عربية بسيطة ترحمني من المواصلات والزحمة اليومية، وتوفّر عليّ وقت ومجهود كبير في الشغل والحياة».

2026.. حلم مشترك بالأمان والكرامة

وعن أحلام العام الجديد، يتفق المواطنان على أولوية الأمان والاستقرار، حيث يقول محمد:«في 2026، أول حلم لينا إن ولادنا يروحوا مدارسهم ويرجعوا سالمين آمنين».

بينما يضيف علي: «نفسنا نحس بالاستقرار، بسكن آمن، ودخل ثابت، وحياة تحترم الإنسان».

ويختتمان حديثهما برسالة واحدة لـ«إيجبتك»:«إحنا مش ضد حد، إحنا بس بنستغيث، ونتمنى إن أحلامنا البسيطة تلاقي اهتمام حقيقي وتتحول لواقع».