«ضوضاء وإزعاج وخناقات».. أهالي المساكن الشعبية بالأقصر يستغيثون

ناشد أهالي منطقة المساكن الشعبية في شارع التليفزيون بقلب محافظة الأقصر، المسؤولين والجهات الأمنية، بنجدتهم من استمرار إزعاج طلاب المدارس، وسلبهم راحتهم النفسية داخل منازلهم.

أكدت أم محمود، من سكان المساكن الشعبية على إزعاج طلاب المدارس المتكرر للأهالي داخل منازلهم، موضحة أنهم يقومون بالعبور بشارع المساكن وصولا إلى مدارسهم، مؤكدة " زوجى مريض ومش عارفين نرتاح، لا صبح ولا ظهر، رايحين جايين من المدرسة، وبيصوتوا، ويجروا ورا بعض".

ناشدت إحدى السيدات، الشرطة والمسؤولين "أنجدونا دول بيتخانقوا مع بعض وبيضربوا بعض، ومش بيحترموا الناس الكبيرة، مش مرتاحين في بيوتنا، والولاد والبنات بيمشوا مع بعض وبيشتموا بعض بألفاظ خادشة عن الحياء".

أعربت داليا أ، تقطن بجوار المساكن الشعبية، عن استياءها من أصوات الطلاب المزعجة، قائلة “أولادي صغيرين ٣ سنين بيتفزعوا من صوت طلاب المدارس”.

فيمَا قالت سوسن ع "بيبدأوا من الساعة ٧ الصبح في عز ما أحنا نايمين ويصوتوا ويزعقوا، حتى الولاد بيصوتوا ويندهوا على بعض بصوت عالى جدا، ومش بيهمهم، قولتلهم هجيبلكم الشرطة مشيوا ورجعوا تانى يستفزنونا بردوا".

“ شارع الحب” ومقابلات غرامية

أكدت الحاجة أم محمد، من السكان على أن المساكن الشعبية بقت "شارع الحب"، البنات والأولاد الصغيرين بيقابلوا بعض عندنا، وقلة أدب"، مناشدة أولياء الأمور قائلة "لموا بناتكم وحافظوا عليهم ما فيش أمان والشارع بقا عبارة عن قلة أدب رايحين جايين سوا ما فيش حياء".

وطالب الأهالي بضرورة وضع حد لهذه المهزلة، والإزعاج المتكرر لطلاب المدارس، مؤكدين "الطلاب بيضربوا في بعض وعملوا خناقة شديدة طلبنالهم النجدة من فترة، وبيضربوا بعض بالحجارة، لحد ما الطوب جه على البلكونات بتاعتنا".