تفاصيل الحالة الصحية لنجل ميار الببلاوي بعد تعرضه لوعكة
كشفت الفنانة ميار الببلاوي، الحالة الصحية لنجلها عقب نقله لأحد المستشفيات، موضحة أنه شعر بسخونية شديدة وصداع مزمن ثم سقط على الأرض مغمياً عليه، مشيرة إلى أن الأطباء أبلغوها بأنه أصيب بالمتحور الجديد.
الحالة الصحية لنجل ميار الببلاوي
وتابعت ميار الببلاوي، في تصريحات خاصة لـ «إيجبتك» قائلة: « كنت بصور حلقة تلفزيونية من برنامجي، علشان مسافرة النهاردة فوجئت بابني بعتلي رسالة بيقولي الحقيني يا ماما أنا تعبان أوي، وقبل ما أنزل من البيت كان سخن وبيكح وقالي أنه عنده صداع نازل على عينه ومناخيره بتحرقه قولت خد برد عادي وأديته الأدوية المعتادة زي أي أم مصرية الفيتامين سي والمضاد الحيوي والليمون السخن".
وعكة صحية نجل ميار الببلاوي
وأضافت: "نزلت شغلي لما بعتلي اتوترت وقلقت عليه وكلمت الشغالة قالتلي أنه تعبان خدت عربيتي وجيت جري قبل ما أوصل البيت لقيت الشغالة بتصوت وتقولي بعد الشر عليه وقع في الأرض ومفيش نفس والحمد لله كنت قربت من البيت دخلت لقيت ابني مرمي على الأرض لونه شاحب أوي علشان هو أبيض جداً قلب لون غريب ومبينطقش مغمى عليه فوقناه وسندناه أنا والشغالة".
