أميرة سيد مكاوي عن فيلم الست: «منى زكي شاطرة بس مش هتفرج عليه تاني»
تسبب فيلم "الست"، في إثارة جدل واسع بين النقاد وصُناع السينما ولاسيما الجمهور أيضًا، إذ انقسمت الآراء حول العمل السينمائي قبل أن يطرح في صالات السينما، حيثُ خرج البعض ينتقده دون الانتظار حتى يكوِّن رأيه كاملًا، وكأن كوكب الشرق أم كلثوم، لا يجوز الاقتراب منها.
وكشفت الناقدة الفنية أميرة سيد مكاوي، ابنة الموسيقار والملحن الراحل سيد مكاوي، عن تجربتها مع فيلم "الست"، قائلة: "اتفرجت على الفيلم ومن البداية داخلة الفيلم بدون توقعات، يعني لا متحفزه أدور على عيوب، ولا متعاطفة مع حملة الهجوم، فهشوف كله حلو، دخلت بمنتهى البساطة أتفرج على فيلم سينما عاملينه عن ست أيقونية وصوت لم يمر مثله وجزء مهم من وجداني".
وتابعت أميرة سيد مكاوي، قائلة: "الفيلم حلو، مروان حامد مخرج مهم جدًا وكبير، ديكور محمد عطية عظيم، مونتاج أحمد حافظ هايل، ملابس ياسمين القاضي تجنن، الإضاءة والتصوير والكادرات كله جميل".
وأضافت أميرة سيد مكاوي، قائلة: "لكن الإحساس اللي كان عندي طول الوقت إن ده فيلم مش لينا، ده فيلم معمول علشان ندخل بيه أوسكار، نشارك بيه في مهرجان كان، حاجة كده يعني مش فيلم لينا كجمهور الست دي جزء من تكوين مشاعره ووجدانه ورمز كبير لينا".
وأكملت أميرة سيد مكاوي، قائلة :"في رأيي اللي أكيد مش مهم أضعف ما في الفيلم هو السيناريو، لأني طول الوقت مش فاهمة هو عايز يقولي إيه، مفيش كونسيبت واضح بيتكلم عنه، يعني لا طلت أشوف مشوار الست بتفاصيله، ولا قدرت أشوف الزاوية الإنسانية البحتة فيها بعيدًا عن الفن، ولا تعاطفت معاها كست لو ده اللي بنتكلم عنه يعني، كل حاجه بتجري بسرعه ومن غير ما الحق اشتبك معاها شعوريا علشان أقدر أقول إنه فيلم أثر فيا على أي مستوى، وده عيب إنه حكى من بداية حياتها إلى نهايتها".
وأردفت أميرة سيد مكاوي، قائلة: "وأعتقد إنه الكاتب فيما رأيت له من أعمال سابقة خياله الشخصي أقوى من إنه يكتب سيرة عن شخصية بالفعل موجودة في الحياة، لأن دي موهبه تانية خالص، خلق حدوتة من الخيال أسهل من إنك تنسج فكرة أو زاوية عن شخص بالفعل موجود وحكايته معروفه".
واستكملت أميرة سيد مكاوي، قائلة: "حاجة كمان محبتهاش وده ذوق شخصي جدًا، إحنا بنحكي حدوتة عن ست مصرية شرقية شغلتها الغناء والموسيقى، والموسيقى الشرقية تحديدًا، كنت أتمنى إن هشام نزيه يعمل موسيقى شرقية أكتر، أسمع فيها عود وناي وقانون وكمانجات، أحس بروح شرقية أكتر من إني أسمع توزيع غربي، أو تيمات هوليوديه، بس ده ذوق شخصي يعني".
وأضافت أميرة سيد مكاوي، قائلة: "ملحوظة على جنب كمان، الملكة نازلي في بيتها وفي حفلة لابسة نفس العقد والحلق؟، يا راجل ده إحنا عندنا متحف لمجواهراتهم، ده غير طبعًا إن العقد ده التاج بتاعها".
أميرة سيد مكاوي: منى زكي شاطرة جداً في فيلم الست
وعن التمثيل، قالت أميرة سيد مكاوي :"نيجي بقى للتمثيل، مش هقدر الحقيقة أقول التمثيل رائع على أي حد لأن معظم اللي موجودين كانت مشاهدهم مش كتير على الشاشة، كلهم أدوا المطلوب، آه استغربت جدًا إن شخصية أحمد رامي، في الفيلم على مرور العمر كله للست هي بتكبر عمرًا وهو شكله زي ما هو مبيتغيرش".
أما عن تمثيل منى زكي، فقالت أميرة سيد مكاوي: "نيجي بقى لـ منى ذكي، منى إللي عملت السيندريلا، مختلفة عن منى الحالية، اكتسبت خبرة ونضج بالتأكيد لكن هل أنا شفت الست أم كلثوم شكلًا من البدايه للنهايه؟ لأ، شفتها في مشهد عبدالناصر ومشهد المعجب الجزائري، حتى في المرحلة الوسطى من عمرها مشفتش أم كلثوم شكلًا وإحنا عندنا ريفرنس للسن ده في أفلامها وده عيب ماكيير طبعًا، لكن منى الممثلة اللي بتتعامل مع الشخصية اللي مكتوبة لو شلت إنها أم كلثوم، ممثلة شاطرة جدًا، حاولت واجتهدت جدًا في الحركة والوقفة".
وطرحت أميرة سيد مكاوي، عدة تساؤلات قائلة: "هل الفيلم عموماً حلو؟ طبعًا، هل الفيلم هيعمل تحول في السينما المصرية والكلام الكبير ده؟ معرفش، هل الفيلم وحش وميتشافش؟ لا برضه، هل الفيلم أنا شخصيًا ممكن أشوفه تاني بعد سنين؟ مظنش".
واختتمت أميرة سيد مكاوي، قائلة :"أنا بالنسبالي دخلت فيلم لطيف تجريبي طويل عن سيدة عظيمة، لا انبهرت بيه ولا أتضايقت منه".
وأضافت: "لكن سحيت عياط في نهاية الفيلم، مفيش حد دلوقتي ممكن جنازته وتأثيره على الناس ممكن يكون كده، وغير مشهد الجنازة المهيب على شاشة السينما، الفكرة دي لوحدها تبكي يستاهل تشوفوه وتقضوا وقت لطيف، بس من غير توقعات".
