النادي على حافة الإنهيار.. تصريحات خطيرة من نائب الزمالك| ماذا قال؟
علق المهندس هشام نصر، نائب رئيس نادي الزمالك، علي ملف أزمة أرض مدينة 6 أكتوبر والأزمات المالية التي تحاصر القلعة الحمراء.
قال نائب رئيس نادي الزمالك عبر تصريحات تليفزيونية: بيان مجلس الإدارة الغرض منه إن الرسالة دي مش موجهة من مجلس إدارة نادي الزمالك بس دي موجهة من مجلس الإدارة وأعضاء الجمعية العمومية وجماهير الزمالك في مصر وبره مصر لأن الموضوع أكبر بكتير من مجرد أرض وأرض بديله.
تابع نائب الزمالك: القضية مش أرض نادي الزمالك فقط لكن عند النادي مشكلة كبيرة وكان من الحلول الرئيسية ليها مشروع أرض 6 أكتوبر وبعد ما خدنا موافقات من كل الجهات وبدأنا خطوات المشروع بدأ يجيب ثماره ويحل جزء من أزمات النادي.
أضاف نائب الزمالك: بناءا على الموافقات دي أصبح على النادي ديون ومستحقات لطرفين ومستثمرين دخلوا معانا في المشروع ومقاولين بيطالبوا بحقوقهم يومياً والنادي مطالب بسداد هذه الالتزامات.
ملف أزمة أرض الزمالك
واصل نائب الزمالك: نقل الأرض من موقع مول العرب إلى حدائق أكتوبر كان تراجع في المستوى ولو حصل نقل ثالث لمكان أبعد أكيد هيكون أقل من المستوى وده صعب تماماً لأن المستثمرين مش هيوافقوا والإستشاريين اللي شغالين بقالهم سنة وليهم مستحقات هتضيع ونبدأ المشروع من الصفر.
وأكمل نائب الزمالك: فكرة الأرض البديلة معناها إن حلم فرع نادي الزمالك الجديد يبدأ من أول وجديد وده غير منطقي وغير عادل للنادي ولا لجماهيره.
وأتم نائب الزمالك: الحل اللي قدامنا هو اللجوء لرئيس الجمهورية ومحاولة مقابلته لشرح الموقف لإن المشكلة بقت مرتبطة بمستقبل 40 أو 50 مليون زملكاوي ومش مجرد قرار إداري داخل نادي.
وأردف هشام نصر: الزمالك حالياً بيعاني من أزمة مالية حادة والمرتبات بتتجمع بتبرعات من أعضاء مجلس الإدارة ولو النادي موقفش على رجله ويسدد ديونه الأزمة هتكبر أكتر.
وأسهب نائب الزمالك: إحنا ناشدنا من على منبر البرنامج فخامة الرئيس ومستعدين نشكل لجنة من مجلس الإدارة ورموز النادي لشرح حجم المشكلة بالأرقام والتواريخ.
واستطرد نائب الزمالك: لجأنا للقضاء ولكل الوزارات وشرحنا في كل القنوات إن الموضوع مش أرض بس ده مشروع كان ممكن يكون حل عام لكل أندية مصر وبدأ فعلاً يخفف الأزمة لكن اللي بيحصل دلوقتي بيدخل النادي في مأزق كبير في كل الألعاب مش كرة القدم بس.
وقال نائب الزمالك أيضا: واضح إن التقارير اللي واصلة عن الموضوع ده مجتزأة مش واضحة تماماً... إحنا مستعدين نشرح بالأرقام وبالتواريخ.
واختتم هشام نصر تصريحاته قائلا: بكره هيتم إرسال خطاب رسمي لرئاسة الجمهورية لطلب مقابلة وشرح أبعاد المشكلة بالكامل وليس موضوع الأرض فقط.