مصطفى يونس بعد إخلاء سبيله: أنا عاشق للأهلي.. والخطيب أخويا
حرص مصطفى يونس، نجم النادى الأهلى السابق، على توجيه عدة رسائل لمجلس إدارة النادي الأهلى برئاسة محمود الخطيب، في أعقاب أزمته الأخيرة مع القلعة الحمراء.
جاءت تلك التصريحات بعد ما قررت جهات التحقيق بالنزهة إخلاء سبيل مصطفى يونس في بلاغ محمود الخطيب ومجلس إدارة الأهلي بسبب تصريحاته المسيئة بضمان محل إقامته.
وقال مصطفى يونس عبر قناته الرسمية على “يوتيوب”: "إلى شعب مصر العظيم وجمهور النادى الأهلى اللى صنع تاريخ مصطفى يونس، أنا الحقيقة بقالى كتير قوى ما بتكلمش والتزمت بكل حاجة اتقالتلى، وبعدين بيطلع كلام باسمى لم ولن يحدث فى أى وقت من الأوقات".
وتابع:"أنا عمرى ما هابقى زملكاوى لأنى عاشق لتراب النادى الأهلى، وهناك ناس بتسيئ ليا على أساس أن أنا فى خلاف مع النادى الأهلى، ولكن القلعة الحمراء دي حياتي، وإذا كان هناك خلاف فالخلاف ما بين أخوات والخطيب بالنسبة لي أخ، وكل الأخوات والأهل بيتخانقو أو بيزعلو، ده شيء طبيعى، ولكن يبقى الخطيب فى القلب".
وأكمل:" الخطيب بالنسبة لى مش زميل، ولكن ده أخويا وهو فى القلب، وأى حد بيحاول يوقع بينا مش هيعرف، لإنى مقدرش استغنى عنه، يوم ما الخطيب قال إنه عيان فى المستشفى أنا فضلت أبكى كإن أبويا وأمى ماتوا مع بعض".
وشدد: "اللى بيشكك في أهلاويتي، أنا دايمًا بقول إن اتنين بيفرحونى فى مصر وهما الأهلى ومحمد صلاح، شيء طبيعى إنى أزعل لما أكون بعيد عن بيتى، لكن يبقى الحب والعشق للأهلى والخطيب وكل ما ينتمى لهذه المؤسسة العظيمة".
وأردف:" مجلس إدارة الأهلى عامل أرقام غير طبيعية فى عدد البطولات خلال الفترة الأخيرة، وبعدين عندنا 4 أندية من فروع النادى الأهلى، مفيش نادى فى مصر عنده ده، أنا بحب الأهلي زى ابنى، وإذا كنت بنتقد فأنا لا أقصد الإهانة أو الإساءة، ولكنى عشان عايزه يكون أحسن نادى فى الدنيا، وهو المتنفس للشعب المصرى، ولما بيكسب بيكون الشعب فى حالة روقان".
واختتم قائلًا: "الناس بتاخد كلامى وبتحرفه، زى اللى بيكتبو ويقولو إنى زملكاوى، وهكتب قصة حياتى عشان الناس تعرف العلاقة بينى وبين الخطيب".