فوزي حسن لـ«إيجبتكِ»: «الهرم مقلوب في حماة الوطن.. واللي بيعترض بيتشال من الجروب»|حوار
المهندس فوزي حسن أمين مركز أبو النمرس سابقًا في حوار لـ"إيجبتكِ":
- حزب حماة الوطن بيدار بسياسة الناظر.. واللي يشتغل يُقصى
- حماة الوطن بقي حزب أوامر.. لا شغل في الشارع ولا احترام للقواعد
- صنعت الحزب في أبو النمرس من الصفر.. ولما اعترضت شالوني من الجروب
- مفيش سياسة ولا شغل.. بس في عقاب لكل صوت مختلف
في استمرار سلسلة التصريحات الغاضبة من قيادات حزب حماة الوطن بمحافظة الجيزة، فجّر المهندس حسن، أمين مركز أبو النمرس السابق بالحزب، مفاجآت جديدة في حوار خاص لـ"إيجبتكِ"، كشف خلاله كواليس الصدام بين القواعد الحزبية والقيادات العليا، مؤكدًا أن ما يحدث داخل الحزب أشبه بـ"مدرسة تعاقب ولا تسمع"، وأن القيادات "غير مؤهلة سياسيًا"، وتتعامل بـ"سياسة الناظر والأستاذ".
قال المهندس حسن: "الهرم مقلوب، اللي فوق بيفرضوا علينا تعليمات مش منطقية، مش بنشارك فيها، ولا حد بيتعاون مع الناس في الشارع، ومش مؤهلين أصلاً للعمل السياسي، وأي محاولة للتواصل أو تقديم مبادرات، بتواجه بصمت أو تجاهل".
وأضاف: "طلبنا ننزل فعاليات، نتحرك في الشارع، وقلت لهم: هاتوا اتوبيسين، تلاتة، نتحرك بيهم، نتفاعل مع الناس، مفيش استجابة، كأن محدش سامع، أو مش فارق معاهم".
دكتور نافع واخدها "عافية".. ولما هاجمته حذفني من جروب الحزب
شن حسن هجومًا مباشرًا على النائب د. نافع عبد الهادي، عضو مجلس النواب، وقال: "الدكتور نافع واخدها عافية، وأنا لما هاجمته على جروب الحزب، حذفني فورًا، ومردش عليا بعدها خالص، رغم إن أنا اللي أنشأت حزب حماة الوطن في مركز أبو النمرس من الصفر".
وتابع: "الأمانة بتاعتي كانت بتطالب باستقالة جماعية، وكل ما نخاطب المركزية، مفيش رد، كأننا مش موجودين، في حالة لا مبالاة غريبة، حتى المساعد لما كلمني، قاللي هكلمك آخر النهار، ومحصلش".
أمين الجيزة هو سبب المشاكل.. ومحتاجين شخصية سياسية مخضرمة
وجّه حسن انتقادات مباشرة إلى قيادة الحزب بالمحافظة، وقال: "أمين الحزب في الجيزة هو سبب المشاكل كلها، ومافيش أي معايير حقيقية في اختياره، وإحنا مش في مدرسة سياسية علشان اللي يعترض يتشال من الجروب ويتعاقب".
وأضاف: "الجيزة محتاجة سياسي حقيقي، مخضرم، يعرف الناس ويتحرك على الأرض، مش شخص بيصدر أوامر ويختفي".
سبب الاستقالات؟ وعود كاذبة ومفيش أي مصداقية
وفي ختام حديثه، قال المهندس حسن: "الاستقالات المتكررة سببها الأساسي هو الوعود الكاذبة.. مفيش حد صادق، والمؤمن الحقيقي لا يكذب".