أستاذ جامعي يطالب بإحالة واقعة وفاة طالب مدرسة STEM للنيابة العامة

علق الدكتور محمد عبد العزيز، أستاذ العلوم والتربية بجامعة عين شمس، على واقعة وفاة الطالب أدهم عاطف محمد بمدرسة المتفوقين للعلوم والتكنولوجيا STEM ببني سويف، الذي وافته المنية أمس، إثر تعرضه لأزمة صحية قائلًا: "أنا شايف إن في فعلاً إهمال، مؤكدا أن رواية زملائه في المدرسة التي تم تداولها على صفحات السوشيال ميديا لا يمكن تكون كذب فنعمل جميع أن الأولاد الصغيير مش هيكذبوا، وواضح من رسائل أولياء الأمور أو الطلبة نفسهم المتداولة إن في إهمال موجود داخل المدرسة، سواء من ناحية الإدارة أو من ناحية الرعاية الطبية."

وأكد  أستاذ العلوم والتربية بجامعة عين شمس في تصريحات خاصة لـ"إيجبتك" أن وجود مدرسة داخلية يفرض إشرافًا إداريًا مستمرًا من خارج المدرسة، وتحديدًا من وزارة التربية والتعليم، مضيفًا: "في إدارة خاصة بتعليم الـSTEM موجودة في الوزارة، ليه ما بتتابعش المدرسة وتشوف السلبيات؟"

وتابع الدكتور عبد العزيز: "أنا شايف إن في بعض الطلبة كاتبين إن الأكل فيه حشرات… ده على عهدتهم، بس لو فعلاً الأكل فيه حشرات فدي مسألة خطيرة جداً، وبتأكد فكرة الإهمال، وإن الطبيبة مش قايمة بدورها، المفروض طالما في مدرسة داخلية وفي أكل بيتقدم للطلبة يكون في إشراف صحي عليه، والمسؤولة عن ده هي طبيبة المدرسة."

وأشار إلى خطأ بالغ في تشخيص الحالة الصحية للطالب، قائلًا: "التشخيص كان لازم يتم في مستشفى خاص، كلنا عارفين وضع المستشفيات الحكومية إزاي تشخص الطبيبة الحالة إنها نزلة برد، ويتضح من كلام الطلبة إن عنده التهاب سحائي؟ ده خطأ جسيم."

وشدد على ضرورة فتح تحقيق موسع: "الموضوع لازم يتفتح فيه تحقيق كبير من النيابة العامة ويتم غلق المدرسة كما هي، والتفتيش وتقييم الوضع لمعرفة الحقيقة، مين اللي كلامه صح ومين اللي بيتجنى."

وأعرب عن بالغ القلق قائلًا: "دي مسألة خطيرة جدًا… لما مدارس الـSTEM يحصل فيها الكلام ده، طب سابت إيه للمدارس الحكومية العادية؟ دول أولاد متميزين جدًا، ثروة مصر في المستقبل."

وفي تعليقه على بيان الوزارة، قال: "بيان الوزارة رسمي… طبيعي ينفوا السلبيات، لكن اللي يحسم الأمر جهة تحقيق محايدة، خصوصًا إن في روح راحت، وده مش موضوع بسيط."

واختتم بقوله: "لازم نشوف تشخيص حالة الطالب، وإذا ثبت وجود إهمال من المدرسة أو الطبيبة، يتم معاقبة الجميع عقابًا يتناسب مع الجُرم، ده جرس إنذار خطير جدًا، ووزير التعليم لازم يطلع ببيان ويتم التفتيش على جميع مدارس الـSTEM للتأكد من مطابقتها للمعايير."